ГЕЙМИФИКАЦИЯ ЭЛЕМЕНТТЕРІН ҚОЛДАНУ АРҚЫЛЫ МАТЕМАТИКА САБАҚТАРЫН ЖОСПАРЛАУ ӘДІСТЕРІ

Аннотация. Бұл мақалада бастауыш сынып математикасын оқытуда геймификация элементтерін қолдану арқылы сабақтарды жоспарлаудың тиімді әдістері талданады. Геймификацияның оқушылардың пәнге қызығушылығын арттыруға және оқу нәтижелерін жақсартуға әсері қарастырылады. Сондай-ақ, ойын түріндегі тапсырмалар, жарыстар мен деңгейлік тапсырмаларды қолдану жолдары ұсынылған.

Кілт сөздер: геймификация, математика, бастауыш сынып, ойын әдістері, инновация, оқу мотивациясы.

Қазіргі заманауи білім беру жүйесінде оқушылардың танымдық белсенділігін арттыру маңызды мәселе болып табылады. Әсіресе, бастауыш сыныптарда математика пәнін игеру кейде қиындық тудыруы мүмкін, өйткені бұл кезеңде балалардың назарын сабаққа шоғырландыру күрделі міндет. Осы мәселені шешу үшін білім беруде инновациялық әдістерді қолдану қажеттілігі туындайды. Геймификация – сабақтарды қызықты және тиімді ету үшін қолданылатын заманауи әдістердің бірі[1]. Бұл әдіс білім беру процесін ойын элементтері арқылы түрлендіруге мүмкіндік береді, оқушылардың сабаққа қызығушылығын арттырады және оқу мотивациясын нығайтады].

Геймификацияның білім берудегі рөлі

Геймификация – бұл ойын элементтерін оқу процесіне енгізу арқылы оқушылардың белсенділігін арттыруды көздейтін әдіс. Ойынның негізгі элементтері, мысалы, деңгейлер, марапаттар, ұпайлар, жарыстар, мақсаттар мен тапсырмалар оқушыларды ынталандырудың тиімді құралы болып табылады. Бұл әдіс оқушылардың қызығушылығын арттырып қана қоймай, олардың оқу нәтижелерін жақсартуға мүмкіндік береді[2].

Математика сабақтарын жоспарлауда геймификация элементтерін қолдану әдістері

Математика сабақтарында геймификация элементтерін қолдану үшін келесі әдістерді пайдалануға болады:

1. Ойын түріндегі тапсырмалар құрастыру. Әр сабаққа байланысты тақырыпты меңгеруге арналған ойын тапсырмаларын әзірлеу. Мысалы: «Сандар лабиринті» ойыны – оқушылар белгілі бір математикалық амалдарды орындап, дұрыс нәтиже арқылы лабиринттен шығу жолын табады[3].

2. Жарыс элементтерін қосу. Сабақ барысында оқушыларды топтарға бөліп, жарыс ұйымдастыру. Бұл балалар арасында ынтымақтастық пен жарысу рухын қалыптастырады. Мысалы, әр дұрыс есеп шығарғаны үшін ұпай беріп ұпайлар жинақтау жүйесін қолдану[4].

3. Деңгейлік тапсырмалар. Сабақ жоспарына деңгейлік тапсырмаларды енгізу. Оқушылар жеңіл тапсырмадан күрделіге қарай ауысып, өздерінің оқу қарқынын бақылауға мүмкіндік алады. Мысалы: 1-деңгей: Қарапайым қосу және азайту; 2-деңгей: Күрделі көбейту және бөлу есептері; 3-деңгей: Логикалық есептер[5].

4. Цифрлық платформаларды қолдану. Геймификацияны цифрлық технологиялармен біріктіру тиімді. Бастауыш сынып оқушыларына арналған Kahoot, Quizizz, Mathletics сияқты платформаларды қолдану – сабақтарды қызықты етіп ұйымдастырудың заманауи тәсілі[6].

5. Жеке жетістіктерді марапаттау. Әр оқушының жетістіктерін атап өту және оларды мадақтау. Сабақ барысында стикерлер, медальдар немесе сертификаттар беру арқылы оқушыларды жігерлендіруге болады[7].

Қорытындылай келе, геймификация элементтерін қолдану арқылы математика сабақтарын жоспарлау – оқушыларды пәнге қызықтырудың тиімді әдістерінің бірі. Бұл тәсіл білім беру процесін әртараптандыруға, оқушылардың оқу нәтижелерін жақсартуға және сабақтарды шығармашылық тұрғыдан өткізуге мүмкіндік береді. Сондықтан мұғалімдерге сабақ жоспарларында геймификация әдісін қолдануды ұсыну өте тиімді болады[8].